Centro di Desaroyo di Hende Muher (CEDEHM)

Nos Servicionan

Pa cumpli cu e metanan menciona CEDEHM ta haci investigacion, tuma iniciativa, promove derecho igual, oportunidad igual, libertad y responsabilidad (social) den e comunidad Arubano, no solamente pa hende muhe pero tambe pa e hende homber e.o. riba tereno economico, cultural y social den cual cada persona ta wordo encurasha pa bira e economicamente independiente.

CEDEHM ta duna oido y guia na cliente atraves di un “walk-in basis”, sin cita adelanta.

Conseho juridico y social.

Referi na otro instancianan.

Señala tendencianan actual.

Desaroya proyectonan y organisa campañanan di concienticacion.

Desaroya y implementa programanan di empoderamento “Mentorship Programs”.

Desaroya programanan pa empodera e hende muher riba tereno economico.

Peticion pa ayudo.

CEDEHM ta traha hunto cu otro departamentonan y organisacionan (gobernamental y no gobernamental) y ta fungi como un punto di contacto pa organisacionnan internacional y nacional y como vocero, specialmente di e hende muhe Arubiano.

Institucion huridico di CEDEHM

Dia 10 di december 1999, Reino Hulandes a firma un tratado internacional cu Nacionan Uni encuanto eliminacion di tur forma di discriminacion contra e hende muher. E tratado internacional aki ta conoci como “convenio di CEDAW”. E convenio di CEDAW a wordo ratifica dia 22 di mei 2002 y asina Aruba, como pais cu ta forma parti di e Reino Hulandes,tambe ta comprometi pa cumpli cu e metanan y principionan di e convenio di CEDAW.

Mediante decreto nacional (landsbesluit) di 24 di september 2013 riba propuesta di Minister di Asuntonan Economico, Asuntonan Social y Cultura por medio di previo decision di Conseho di Minister di 27 augustus 2010, a formalisa e desicion pa institui un departamento di gobierno cu lo ta specificamente encarga cu implementacion di e metananan di e convenio di CEDAW na Aruba. Den e cuadro aki dia 1 di januari 2011 a institui Centro di Desaroyo di Hende Muher (CEDEHM) cual departamento ta resorta bou di Minister di Asuntonan Social y Labor.

Meta di CEDEHM

CEDEHM su meta principal, segun e decreto nacional di su institucion, cual ta basa ariba e Convenio di CEDAW, ta pa duna un caracter structural y duradero na varios actividadnan pa desaroya e mehoracion den posicion di e hende muher creando igualdad den generonan. E enfoque riba e mehoracion den posicion (empowerment) di e hende muher ta sali for di e punto di bista di e posicion di desbentaha di e hende muher den nos comunidad actual.

CEDEHM tin ademas e tarea pa conseha gobierno encuanto tur topico cu ta afecta e posicion di e hende muher den e comunidad Arubiano, y den e cuadro aki ta encarga cu:

a) Raportaje cada 4 aña na Nacionan Uni encuanto e progreso di obligacionan, metanan y puntonan di salida di e tratado encuanto eliminacion di tur forma di discriminacion contra e hende muher.

b) Desaroya, sostene y combina actividadnan pa mehoracion di e posicion di e hende muher na Aruba.

SER MUHER TA NOS PODER

Empoderamento di un hende muhe ta cuminsa di paden. Un hende muhe cu sa kico e por ta bira invencibel y por tuma su poder.

Un muhe Empodera, ta Encurasha, Lucha, y Comparti cu otro pa nan ta muhe exitoso di mañan.

-CEDEHM-